Шымкент қаласы Әділет департаментінің ұйымдастыруымен Қазақстан Республикасы Конституциясының 30 жылдық мерейтойына арналған «Ата Заң – Тәуелсіздік тірегі» атты салтанатты іс-шара өтті.
Шараға қала әкімінің аппараты, мәслихат депутаттары, Адвокаттар алқасы, Нотариустер және Жеке сот орындаушылар палатасының басшылары, сондай-ақ нотариустар, адвокаттар, заң консультанттары, жеке сот орындаушылары мен Сот-медициналық сараптама орталығының өкілдері қатысты.
Жиынды Шымкент қаласы Әділет департаментінің басшысы Айнұр Исабекова ашып, Конституцияның ел дамуындағы рөлі мен әділет органдарының осы бағыттағы жұмысын атап өтті.
Іс-шара барысында Оңтүстік Қазақстан университетінің профессоры, заң ғылымдарының кандидаты Асқат Есенәлиев ҚР Конституциясы туралы мазмұнды баяндама жасады. Сонымен қатар, қатысушылар арасында Тәуелсіздік пен Конституция тақырыптарына арналған викторина ұйымдастырылып, әділет органдарының қызметін таныстыратын бейнеролик көрсетілді.
Шара соңында заң саласында абыройлы еңбек етіп жүрген бірқатар сала мамандары — нотариустар, адвокаттар, заң консультанттары мен жеке сот орындаушылар — қала әкімінің, мәслихат хатшысының, сондай-ақ Әділет министрлігі мен Әділет департаментінің алғыс хаттарымен марапатталды.
Іс-шара Конституцияның 30 жылдығын лайықты атап өтудің және заң үстемдігін нығайту жолындағы адал қызметтің маңызын айшықтауға бағытталды. Бұл салтанатты шара заң саласындағы үздіктерді марапаттап, құқықтық мемлекет құрудағы олардың зор үлесін бағалаудың үлгісіне айналды. Тәуелсіздік пен Конституцияның мән-маңызын түсіндіру арқылы еліміздің заң жүйесі мен құқықтық мәдениетінің дамуына қосқан үлес одан әрі жалғасын табары сөзсіз.
Шараның соңында қатысушылар бірқатар маңызды мәселелерді талқылап, құқықтық жүйенің жетілдірілуі мен заң саласындағы үздіктердің еңбегін жоғары бағалаудың маңыздылығын атап өтті. Заң үстемдігін қамтамасыз ету және азаматтардың құқықтарын қорғау жолындағы жұмыстар алдағы уақытта да жалғасып, құқықтық мемлекеттің нығаюына бағытталған қадамдар жасалатыны сөзсіз. Бұл бастама қоғамда әділеттілік пен құқықтық тәртіптің сақталуына үлес қосып, әрбір азаматтың Конституциялық құқықтары мен бостандықтарын қорғауға бағытталды.
Comments