Бүгін, 13 тамыз күні, Қазақстанның көрнекті мемлекет және қоғам қайраткері, бірнеше облысты басқарған ірі тұлға Асанбай Асқаровтың дүниеден озғанына 24 жыл толды. Ол ұлты үшін өлшеусіз үлес қосып, «Халқым аман болса, мен де аманмын!» деген сөздерімен халыққа қызмет еткен ұлы тұлға ретінде тарихта қалды.
Осы атаулы күнге орай, Асқаровтың ескерткішіне гүл шоқтарын қою рәсімі ұйымдастырылды. Шымкент қаласы жұртшылығы, қалалық Ардагерлер кеңесінің мүшелері, зиялы қауым өкілдері мен азаматтар академиктің ескерткішіне гүл шоқтарын қойып, оған тағзым етті.
Салтанатты жиында Қазақстанның еңбек сіңірген қайраткері, заң ғылымдарының докторы, профессор Бекет Тұрғараев Асанбай Асқаровтың өнегелі өмірі мен қоғамға қосқан елеулі үлесін еске алып, оны лайықты құрметтеудің баршамыздың парызымыз екенін атап өтті:
– «Ұлтымыздың қасиетті перзенті, еліне еңбегі сіңген аяулы азамат Асанбай Асқаровтың бүгін дүниеден өткен күні екен. Халқымызда «Ұлыларды ұлықтау – ұрпаққа парыз» деген сөз бар. Біз бүгін сол парызымыздың бір бөлігін орындап тұрмыз. Шымкент қаласының ардагерлері, Асқаровтың ұрпақтары, А.Асқаров атындағы мектеп директорлары, т.б. жиналып, құрмет көрсетіп, ескерткішіне гүл шоқтарын қойдық» — деді Б.Тұрғараев.
Сонымен қатар, «Ұлылар тұғырын өзі тұрғызады, ескерткішін халқы қояды» деген қазақтың дана сөзіне сүйене отырып, Бекет Тұрғараев Асқаровтың ескерткішін халықтың өзі қойып, әр жылы осы күні оған тағзым етіп, гүл шоқтарын қоятындарын айтты.
Тау тұлғаның өнегелі өмір жолын зерттеу және оған құрмет көрсету іс-шаралары жыл сайын дәстүрлі түрде өткізіліп, болашақ ұрпаққа Асанбай Асқаровтың өмірі мен еңбегін таныту мақсатында жалғасын табуда. Асанбай Асқаровтың өмірі мен қызметі қазіргі ұрпаққа ұлттық рухты, ел алдындағы қызметтің маңыздылығын көрсететін жарқын үлгі болып табылады. Оның ескерткішінің алдында тағзым ету арқылы біз ұлы тұлғалардың тарихтағы орнын мәңгілікке сақтап, жастарға патриоттық тәрбие беруді жалғастырамыз.
Comments