Шымкент қаласының Текесу тұрғын алабында жаңа сумен жабдықтау жүйесі іске қосылып, жергілікті тұрғындарға сапалы ауыз суға қолжетімділік қамтамасыз етілді. Бұл жоба тұрғындардың өмір сүру сапасын жақсартуға, ауыз суға қатысты туындаған мәселелерді шешуге бағытталған маңызды қадам болып табылады. Жоба аясында 130 абонент сапалы ауыз сумен қамтамасыз етілді, осылайша, тұрғындардың ауыз суға деген қажеттілігі толық шешілді.
Кеше аталған нысанды қала әкімі Ғабит Сыздықбеков арнайы барып көріп, жергілікті тұрғындарды қуанышты оқиғамен құттықтап, олардың қажеттіліктерін ескеріп, тұрғын үй инфрақұрылымын жақсартуға бағытталған жұмыстардың маңызды екендігін атап өтті. Қала басшысы жобаның маңыздылығын сөз етіп, халықтың тұрмыс сапасын арттыру бағытындағы жүйелі жұмыстардың жалғасатынын жеткізді. Бұл жоба тек қала тұрғындарының ғана емес, бүкіл ауданның әл-ауқатын арттыруға ықпал ететіндігімен ерекшеленеді.
Жоба әкімнің тапсырмасына сәйкес жүзеге асырылып, тұрғындармен кездесулер кезінде көтерілген ауыз су тапшылығы мәселесін шешуге бағытталды. Жалпы ұзындығы 14 шақырым болатын су құбыры тартылып, бұл жұмыстар демеушілердің қаржысы есебінен жүзеге асырылды. Бұл ауқымды жұмыстардың арқасында Текесу тұрғын алабының тұрғындары санитарлық талаптарға сай таза және үздіксіз ауыз суға қол жеткізді.
Қала әкімі демеушілер мен мердігер ұйымдарға көрсеткен әлеуметтік жауапкершіліктері үшін алғыс білдіріп, осындай бірлескен жобалардың қала дамуына елеулі үлес қосатынын айтты. Бірлескен жұмыстың нәтижесінде қала инфрақұрылымы нығайтылып, тұрғындардың әлеуметтік жағдайы жақсарады.
Бұл туралы Шымкент қаласы әкімінің орынбасары, қалалық әкімдіктің ресми өкілі Сәрсен Абайұлы Құранбек Өңірлік коммуникациялар қызметі алаңында өткен брифингте мәлімдеді.
Comments