2025 жылғы 1–14 тамыз аралығында Шымкент қаласында «Таза Қазақстан» республикалық экологиялық акциясы аясында «Таза Қала» атты профилактикалық іс-шара өтуде. Шараның негізгі мақсаты – қала аумағында санитарлық тазалықты сақтау, қоғамдық тәртіп пен тыныштықты қамтамасыз ету, сондай-ақ тұрғындардың экологиялық және құқықтық мәдениетін арттыру.
Рейдтік жұмыстар Шымкент қалалық полиция департаменті мен қала әкімдігі бірлесіп ұйымдастыруымен өткізілуде. Нәтижесінде, бірқатар азаматтар мен кәсіпкерлік нысандардың иелері санитариялық талаптарды сақтамағаны үшін әкімшілік жауапкершілікке тартылды. Сонымен қатар, қоғамдық орындарда тыныштықты бұзған тұлғаларға да заң шеңберінде шара қолданылды.
Шара аясында аулалар мен көшелерге, саябақтар мен скверлерге, жалпыға ортақ пайдаланылатын орындардың тазалығына ерекше мән берілуде. Әсіресе, қала аумағындағы қоғамдық орындар мен көше тазалығына назар аударылып, тұрғындардың тәртіп сақтауға ынталандыру жұмыстары жүргізілуде.
Құзырлы органдар қала тұрғындарын тұрмыстық қалдықтарды арнайы орындарға тастауға, тазалық пен тәртіпті сақтауға және айналадағылардың тыныштығын құрметтеуге шақырады. Бұл бастама тек қала тазалығын қамтамасыз етіп қана қоймай, жалпы экологиялық мәдениетті арттыруда үлкен маңызға ие.
Тазалық – тек органикалық қалдықтарды жинау ғана емес, тұрғындардың әлеуметтік жауапкершілігін, қоғамдық тәртіпті сақтау мен экологиялық сана-сезімді қалыптастыруды талап етеді. Осындай шаралар арқылы қала тұрғындарының біртұтас күш-жігері нәтижесінде Шымкент әсем әрі таза қалаға айналады.
«Таза Қазақстан» акциясы аясында ұйымдастырылатын іс-шаралар барлық өңірлерде экологиялық мәдениетті арттыруға, тұрмыстық қалдықтарды дұрыс басқару мен тазалықты сақтау жөніндегі тұрғындардың жауапкершілігін күшейтуге бағытталған. Алдағы уақытта да бұл шаралар жалғасып, тұрғындардың экологиялық және құқықтық мәдениетін арттыру мақсатында түрлі профилактикалық жұмыстар жүргізілетін болады.
Comments