Еліміздің экономикасын алға сүйреп, өндірістің алғы шебінде жүрген еңбек адамдары – бүгінгінің нағыз батырлары. Олардың бейнеті мен маңдай тері – қоғамның іргесін берік ететін басты күш.
Сол жандардың бірі – 39 жастағы Жандос Жайлаубайұлы. Ол үш жылдан бері Kaspy Steel компаниясында қалыпшы болып еңбек етеді. Бұл – екінің бірінің қолынан келе бермейтін, үлкен шыдамдылық пен жоғары жауапкершілікті талап ететін мамандық. Қалып жасаушының қолынан өтетін әрбір бөлшек – тиянақ пен төзімнің көрінісі.
Жандос – төрт ұлдың әкесі. Ол перзенттеріне өнегелі тәрбие беруді парыз санап, еңбекқорлықтың нағыз үлгісін көрсетіп келеді. Оның күнделікті жұмысы – балғамен соққандай ауыр, бірақ бір сәт те ескерусіз қалмайтын маңызды іс. Зауыттағы гүріл мен ыстық пештер – Жандос үшін үйреншікті, әрі қадірлі орта. Себебі ол бұл жұмысты тек нәпақа көзі емес, еліне қосқан үлесі деп біледі.
Биыл елімізде «Жұмысшы мамандықтар жылы» деп жариялануы да бекер емес. Қоғамның шынайы дамуы – қарапайым еңбек адамын қадірлеуден басталады. Ал қалыпшы сынды мамандықтар – кез келген өндіріс ордасының жүрегі мен тірегі.
Жандос сынды азаматтар – қолымен емес, жүрегімен жұмыс істейтін жандар. Олар даңқ пен марапатты күтпейді, үнсіз еңбегімен ұлт болашағын сомдап келеді. Осындай адамдар барда еліміздің іргесі берік, келешегі кемел болмақ.
Қалыпшы мамандығының маңыздылығын арттырып, олардың еңбегін бағалау бүгінгі күннің маңызды міндеті. Жандос сияқты еңбекқор азаматтар, өздерінің қажырлы еңбегімен ел экономикасының іргетасын қалайды. Олар қоғамның әл-ауқатын жақсарту үшін аянбай тер төгуде, осылайша өз ұрпағына да еңбекқорлықтың үлгісін көрсетіп келеді.
Қалыпшының күнделікті ауыр еңбегі – кәсіпорынның дамуына үлес қосатын ең маңызды факторлардың бірі. Өндіріс пен еңбек адамдарын құрметтеу, солардың арқасында өндіріс орнындағы табыс пен сапа артады. Жандос сияқты азаматтар біздің болашағымызды нығайта бермек.
Comments