КӨЛІК САЛАСЫ ҚЫЗМЕТКЕРЛЕРІНЕ ТӘЖІРИБЕЛІК-ТАНЫМДЫҚ ІС-ШАРА ҰЙЫМДАСТЫРЫЛДЫ

Шаһарда көлік қызметкерлерінің кәсіби мерекесіне орай сала мамандарына арналған бірқатар тәжірибелік-танымдық іс-шаралар өтті. “Жұмысшы мамандықтар жылы” аясында ұйымдастырылған іс-шараның мақсаты – сала қызметкерлерінің еңбегін насихаттау, кәсіпорындар арасында тәжірибе алмасу, серіктестікті нығайту, үздік мамандарды марапаттау.
Атап айтқанда, «NOMAD MOTORS SHYM» ЖШС-да (KIA дилерлік орталығы) өткен іс-шараға “Жол-көлік колледжі” МКҚК-ның әкімшілік өкілдері, арнайы пән оқытушылары мен өндірістік оқыту шеберлері, колледж білім алушылары, талапкерлер қатысты. Қатысушыларға өндірістік процестер мен заманауи құрал-жабдықтар таныстырылып, автокөліктерге қызмет көрсету және жөндеудің жаңа тәсілдері көрсетілді.
Қалалық білім басқармасының бас маманы Айгүл Рүстемова жұмысшы мамандықтар жылы аясында атқарылып жатқан жұмыстар, мақсатты білім беру тапсырысы, әлеуметтік серіктестікті дамыту аясындағы жобалардан хабардар етті.
Сондай-ақ, бүгінгі бағдарлама аясында «Автокөлікті бояу процесінде қолданылатын жаңа технологияларға шолу» тақырыбында шеберлік сағаты көпшілік назарына ұсынылады. BASF концернінің Ұлттық эксперті, «COLORFACTORY GROUP» компаниясының техникалық директоры М.И.Романовтың автокөліктерді бояуда қолданылатын заманауи химиялық және технологиялық шешімдермен таныстыруы жоспарланған.
Бұл іс-шара білім алушыларға өз мамандықтары бойынша нақты тәжірибе жинақтап, нарықтағы жаңа трендтер мен технологияларды меңгеруге мүмкіндік береді. Сондай-ақ, саладағы үздік мамандармен тікелей байланыс орнатып, тәжірибелерін тыңдап, болашақ кәсіби жолдарын дұрыс таңдауға жол ашады.
Жалпы, осындай тәжірибелік-танымдық шаралар кәсіпорындар мен білім беру ұйымдары арасындағы серіктестікті арттырып, жастардың жұмысқа орналасуына көмектеседі. Алдағы уақытта бұл бағыттағы іс-шаралардың жиі ұйымдастырылатыны сөзсіз, себебі олар білім мен тәжірибенің үйлесімін қалыптастыруға зор ықпал етеді.