Келесі жылдан бастап міндетті әлеуметтік медициналық сақтандыру туралы заңға енгізілген жаңа өзгерістерге сәйкес, жергілікті атқарушы органдар әлеуметтік әл-ауқат деңгейі бойынша дағдарыстық және шұғыл жағдайдағы (D және E деңгейі) санаттарына жататын азаматтар үшін сақтандыру жарналарын төлейтін болады. Бұл жаңашылдық әлеуметтік осал топтарды медициналық көмектен қағылмауын қамтамасыз етеді.
Сонымен қатар, ресми түрде жұмыссыз ретінде тіркелген азаматтар да жергілікті бюджет есебінен сақтандыру жүйесіне қосылады. Бұл өзгерістер жергілікті әкімдіктердің халықты жұмыспен қамту, жаңа жұмыс орындарын құру, кедейлікті азайту секілді әлеуметтік-экономикалық бағыттардағы жауапкершілігін арттырады.
МӘМС туралы заңға енгізілген өзгерістерге орай Әлеуметтік медициналық сақтандыру қорының Шымкент қалалық филиалының мамандары Абай ауданы әкімдігінің ұйымдастыруымен Алаш базарында тұрғындармен кездесіп, заңнамадағы өзгерістер туралы түсіндіру жұмыстарын жүргізді. Кездесуде халыққа жаңашылдықтардың маңызы мен артықшылықтары кеңінен түсіндірілді.
Қазіргі таңда Шымкент қаласында тұрғындардың 80%-дан астамы, яғни 1 миллионнан астам адам сақтандырылған. Оның ішінде 700 мыңнан астам азамат жеңілдік санатына жататын азаматтар және олардың сақтандыру жарнасын мемлекет төлейді. Сонымен қатар, 237 492 адамның сақтандыру мәртебесі жоқ, оның ішінде 56 мыңнан астамы – әлеуметтік осал топтарға жататын азаматтар. Бұл көрсеткіштің төмендігі, әлі де болса медициналық сақтандыру жүйесіне қатыспаған азаматтардың бар екенін көрсетеді.
Жаңа өзгерістер медициналық қызметтердің қолжетімділігі мен тиімділігін арттыруға бағытталған. Алдағы уақытта Шымкент қаласында МӘМС жүйесіне қатысты түсіндіру жұмыстары жалғасады, тұрғындарды сақтандыру жүйесіне қамту, медициналық қызметке қолжетімділікті арттыру мақсатында бірқатар іс-шаралар өткізіледі. Бұл халықтың әлеуметтік қауіпсіздігін қамтамасыз ету, медициналық қызметтердің сапасын жақсарту және жалпы денсаулық сақтау жүйесін нығайту жолындағы маңызды қадамдардың бірі болып табылады.
Comments