«AMANAT» партиясы Шымкент қалалық филиалы «Құқықтық көмек» партиялық жобасы аясында қоғамдық қабылдау ұйымдастырып, бұл шара азаматтарға құқықтық кеңестер беріп, заңдық мәселелерін шешуге бағытталды. Іс-шараның басты мақсаты – азаматтардың құқықтық сауаттылығын арттыру, олардың құқықтарын қорғауға жағдай жасау және даулы мәселелерін заң аясында шешуге қолдау көрсету. Қоғамдық қабылдауға келген тұрғындар түрлі сұрақтарымен мамандарға жүгінді, бұл халық арасында партияның халыққа жақындығын арттырып, құқықтық мәселелерді шешуге деген сенімділік қалыптастырды.
Қоғамдық қабылдауға «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, Әділет департаментінің мамандары Серік Алимкулов пен Камшат Меденова, «Zangerler Palatasi» заң консультанттары Нұрлан Мырзабай, Сәбижан Нысанов, Олжас Қали, сондай-ақ адвокат Бауыржан Мархабаев қатысты. Олар келген азаматтарды жеке-жеке қабылдап, мәселелерін тыңдап, нақты құқықтық кеңес берді. Әрбір қабылданған азаматқа өз мәселесін шешу жолдары туралы толық түсінік беріліп, оларды заңдық тұрғыда қорғауға қатысты нақты ұсыныстар айтылды.
Қабылдауға 30-ға жуық қала тұрғыны жүгінді. Олардың ішінде жер мәселесі, алаяқтарға алданып қалғандар, алимент өндіруде қиындыққа тап болғандар, несие қарызынан зардап шеккендер, сот орындаушылардың әрекетіне шағымданғандар болды. Азаматтардың көкейкесті сұрақтары түрлі құқықтық салаға қатысты болды, бұл қоғамдық қабылдаудың маңыздылығын тағы да көрсетті. Әрбір азаматтың өтініші мұқият қаралып, заң аясында тиісті түсіндіру және көмектер көрсетілді. Мамандар тарапынан құқықтық кеңестер беріліп, ары қарайғы әрекеттер бойынша нақты ұсыныстар айтылды.
Қабылдауда азаматтар өздерінің құқықтарын қорғау жолында барлық сұрақтарына толық жауап алды және болашақта құқықтық мәселелерді шешу бойынша қажетті әрекеттерді білуге мүмкіндік алды. «AMANAT» партиясы тұрғындардың құқықтық мәселелеріне үнемі көңіл бөліп келеді. Партияның бұл бастамасы тұрғындар арасында үлкен қызығушылыққа ие болып, оларды құқықтық сауаттылықтарын арттыруға ықпал етуде. Бұл бағыттағы қоғамдық қабылдаулар алдағы уақытта да жүйелі түрде жалғасын табатын болады.
Comments