«AMANAT» партиясының «Кедергісіз келешек» жобасы аясында мүгедектігі бар азаматтарды жұмыспен қамтуға бағытталған 2–4% көлеміндегі квота талаптарының орындалу барысына мониторинг жүргізілуде. Бұл мәселе қоғамда үлкен маңызға ие, өйткені әлеуметтік теңсіздіктерді жою және әрбір азаматтың құқықтарын қорғау – біздің ортақ міндетіміз. Осы мақсатта Шымкент қаласындағы «Interteach» медициналық орталығының еңбек ұжымымен кездесу өтті.
Іс-шараға Шымкент қалалық мәслихатының депутаты, партия фракциясының мүшесі Бақытжан Позилов, партияның белсенді мүшелері және Әл-Фараби ауданы бойынша мансап орталығының басшысы Нұрбол Шымкентбаев қатысты. Сонымен қатар, кездесуге қала тұрғындары мен жұмыс берушілер де шақырылды, олар өз пікірлері мен ұсыныстарын білдірді.
Кездесу барысында ерекше жандарды жұмысқа орналастыру, жұмыс берушілердің әлеуметтік жауапкершілігі, сондай-ақ инклюзивті еңбек ортасын қалыптастыру мәселелері кеңінен талқыланды. Әлеуметтік тұрғыдан осал топтардың экономикалық белсенділігі қоғамның әл-ауқатын жақсартудың бірден-бір жолы екендігіне назар аударылды. Сонымен қатар, жұмысқа орналастыруда кездесетін кедергілер мен шешу жолдары қарастырылды.
Тараптар инклюзивті қоғам құру жолында жұмыс берушілердің рөлін күшейтудің маңыздылығына тоқталып, заңмен бекітілген квотаның нақты орындалуын қамтамасыз ету қажеттігін атап өтті. Мүгедектігі бар азаматтардың еңбек нарығына қатысуы олардың әлеуметтік белсенділігін арттырып қана қоймай, мемлекетіміздің тұрақты дамуына да үлес қосады.
«AMANAT партиясының басты мақсаты – әрбір азаматқа тең мүмкіндік жасап, олардың қоғамның толыққанды мүшесі ретінде өмір сүруіне жағдай жасау», – деп атап өтті Бақытжан Позилов. Сонымен қатар, ол партияның алдағы уақытта мүгедектерге арналған жұмыс орындарын көбейту үшін нақты қадамдар жасайтынын айтты.
Бұл жоба аясында азаматтар үшін жұмыс орындары мен әлеуметтік қызметтерді ұсыну арқылы мүгедектердің қоғамға бейімделуін жеңілдету, сондай-ақ жұмыссыздық мәселесін шешу көзделеді. Ерекше қажеттіліктері бар адамдардың кәсіби даму мүмкіндіктерін қамтамасыз ету үшін үкімет пен жеке сектор арасындағы ынтымақтастықты күшейту керек.
Қоғамдағы теңдікті қамтамасыз ету және әрбір азаматтың толыққанды өмір сүруі үшін қолдау көрсету — бұл тек партияның ғана емес, бүкіл қоғамның басты міндеті.
Comments