Бүгінде “Shymkent Creative Hub” креативті орталығы өз жұмысын белсенді түрде жалғастырып, түрлі салада шығармашылық әлеуетті арттыруға бағытталған маңызды алаңға айналды. Орталықта қолөнер мен өнерге қызығушылығы бар тұрғындарға, әсіресе студенттерге арналған әртүрлі бағыттағы шеберлік сағаттары тұрақты түрде ұйымдастырылып келеді. Мұнда адамдар жаңа дағдыларды меңгеріп, шығармашылық идеяларын жүзеге асыруға мүмкіндік алады.
Shymkent Creative Hub – шығармашыл жастардың тоғысар орталығы, жаңа идеялардың өрістейтін кеңістігі. Бұл алаңда түрлі салалардағы резиденттер өз тәжірибелерімен бөлісіп, қатысушылардың шығармашылық әлеуетін дамытуға үлес қосып келеді.
“Shymkent IT Hub” – Цифрлық Трансформацияның Жаңа Бастамасы.
Шымкент қаласында жүзеге асырылған «Shymkent IT Hub» жобасы өңірдегі цифрлық трансформацияның маңызды кезеңін білдіреді. Қазақстан Республикасының Президенті Қасым-Жомарт Тоқаевтың тапсырмасы бойынша «Astana Hub» үлгісінде еліміздің барлық өңірлерінде ІТ орталықтар ашу жоспарланған болатын. Осы мақсатта, 2023 жылдың мамыр айында Шымкент қаласында «Shymkent IT Hub» орталығы ашылды.
Аталмыш орталық өңірдегі ІТ кәсіпкерлікті дамыту мен цифрлық технологияларды енгізуге үлкен үлес қосуда. Сонымен қатар, өңірдегі жас кәсіпкерлер мен стартап жобаларға қолдау көрсету үшін түрлі іс-шаралар ұйымдастырылуда. Бұл орталық тек ІТ мамандары үшін ғана емес, жалпы қала тұрғындары үшін де жаңа мүмкіндіктер мен білім алаңы болып табылады.
Shymkent IT Hub орталығында технологиялық кәсіпкерлікті дамыту және ІТ қауымдастығын қалыптастыру мақсатында 72 іс-шара өткізіліп, 2000-ға жуық адам тіркелді. Аталған шаралардың бірі — еліміздегі ең ірі «Decentrathon 2.0» хакатоны, оған 2000-нан астам қатысушы қатысты. Өңірден 80 адамнан тұратын 29 команда бақ сынады. Бұл жарыс жасанды интеллект, блокчейн, ойын индустриясы мен телеграм шағын қосымшалары сияқты маңызды ІТ бағыттарында өтті.
Shymkent Hub ғимаратында Astana Hub-тың білім беру және инкубациялық бағдарламалары жүзеге асырылған. Мұнда митаптар, Pizza Pitch, воркшоптар, Speaker Talks, Idea Battle және ІТ-қауымдастықтың қалыптасуына ықпал ететін басқа да көптеген түрлі іс-шаралардың өтуі мүмкіндігі бар. Инкубациялық кезеңде стартап-жобаларды құру барысында қатысушылар кәсіпкерлік негіздері бойынша білім мен инвестиция тартуда қолдау алып, қаржылық есеп жүргізу және басқа да қажетті дағдыларды меңгереді.
Shymkent IT Hub жобасы тек ІТ мамандары үшін емес, бүкіл халық үшін жаңа мүмкіндіктер мен білім алаңын ұсынып, Шымкент қаласының цифрлық трансформациясы мен инновациялық даму жолында маңызды қадам жасайды.
Comments