Шымкент қаласы Еңбекші ауданында «AMANAT» партиясының «Ардагерлерді ардақтайық» жобасы аясында тағылымды шара өтті. Аудандық партия филиалының төрағасы Таймас Қамбатыров және атқарушы хатшысы Мақсат Жолдасбеков жалғыз тұратын қарттардың үйіне арнайы барып, жағдайларын білді. Олар қарттардың тұрмыстық жағдайын анықтап, қажетті көмек көрсету үшін арнайы тізім жасады. Партия мүшелері мен аудандық әкімдік өкілдері ардагерлердің тұрмысын жақсарту бойынша бірқатар шараларды қолға алу туралы келісімге келді.Шара барысында ардагерлерге әлеуметтік көмек көрсетіліп, олардың көңілдерін аулап, жан жылуын сыйлады. Қарттарға азық-түлік, дәрі-дәрмек және тұрмыстық заттар жеткізіліп, оларды қажетті медициналық қызметтермен қамтамасыз ету мәселелері де талқыланды. Бұл іс-шара тек біркүндік көмек емес, жүйелі жұмыс болып, ардагерлердің тұрмыс деңгейін арттыруға бағытталатын болады.Игі бастаманың мақсаты – қоғамымыздың алтын діңгегі саналатын аға буын өкілдеріне қамқорлық көрсету, тұрмыстық жағдайларына бейжай қарамай, оларды назардан тыс қалдырмау. Қарттардың ел тарихындағы алар орны мен олардың өсиет қалдырған тәжірибесін ескеріп, партия ардагерлердің әлеуметтік қолдау шараларын кеңейтуді жоспарлап отыр. Қариялар – елдің өткені мен келешегін жалғап тұрған асыл тұлғалар. Оларға құрмет көрсету – әрбір азаматтың адами әрі азаматтық борышы. Олар тек қарттар ғана емес, елдің рухани ұстазы әрі ұлттық дәстүрлеріміздің сақтаушысы болып табылады.Қарттар да өз кезегінде жылы лебіздерін білдіріп, ақ баталарын беріп, өмірлік тәжірибелерімен бөлісті. Өздерінің өмір жолы мен қиындықтар туралы айтып, бүгінгі ұрпаққа маңызды сабақтар берді. Бұл ардагерлердің қоғамға қосқан үлесін бағалауға тағы да бір рет дәлел бола түседі.Ардагерлерді ардақтау – өткенге тағзым, болашаққа бағдар. Бұл игі дәстүр алдағы уақытта да жалғасын тауып, қоғамдағы бірлік пен ұрпақтар сабақтастығын нығайтатын болады. Партия өкілдері алдағы уақытта да ардагерлермен кездесулер ұйымдастырып, оларға тұрақты түрде көмек көрсету жоспарында тұр.
Comments