«AMANAT» партиясының «Жастарға жұмыс» жобасы аясында Шымкент қалалық мәслихатының депутаты, партия фракциясының мүшесі Нұрсұлтан Балабиев жас буынмен кездесу өткізіп, кәсіпкерлік саласына қатысты кеңестерімен бөлісті.
Кездесуге «AMANAT» партиясы Шымкент қалалық филиалы төрағасының міндетін атқарушы Ербол Байқонысов, Абай аудандық филиалдың атқарушы хатшысы Әбдез Рахманұлы және партияның қалалық филиалы жанындағы «Жастар рухы» жастар қанатының төрағасы Бекзат Төлебай қатысты.
Бұл жиын «Жұмысшы мамандықтары жылы» аясында ұйымдастырылды. Мақсат – жастарға кәсіпкерлікпен айналысу жолдарын түсіндіру, еңбек нарығындағы мүмкіндіктермен таныстыру және олардың көкейіндегі сауалдарға жауап беру. Сонымен қатар, жастар арасында жиі кездесетін өзекті мәселелерді ашық талқылау болды.
Іс-шара барысында Ербол Байқонысов партия тарапынан кәсіпкерлікке ынталы жастарға қолдау көрсетуге бағытталған нақты шаралар жүзеге асырылып жатқанын атап өтті.
«AMANAT» партиясының бағдарламасына сәйкес, 2027 жылға дейін Шымкент қаласында кәсіпкерлік саласында жұмыспен қамтылғандардың санын 200 мыңнан асыру көзделіп отыр. Сонымен қатар, кәсіпкерліктің жалпы өңірлік өнімдегі үлесін 45%-ға жеткізу жоспарланған. Осы бағытта түрлі мемлекеттік бағдарламалар мен гранттық қолдау тетіктері іске асырылып келеді. Мұндай мүмкіндіктерді тиімді пайдалана білген жастардың өз ісін бастауына барлық жағдай жасалған», – деді ол.
Өз кезегінде Нұрсұлтан Балабиев кәсіпкерлікке бет бұрғысы келетін жастарға табысқа жетудің басты шарттарын түсіндіріп берді.
«Істің көзін тапқан адамға кәсіппен айналысу қиын емес. Әрине, кей жағдайда бастаған іс сәтсіздікке ұшырауы мүмкін. Бұл көп жағдайда дұрыс жоспардың болмауынан туындайды. Сондықтан, кәсіп ашқысы келетіндер үшін кәсіпкерлік негіздеріне арналған курстардан өту – маңызды қадам. Ең бастысы – ізденістен тоқтамау», – деді депутат.
Кездесу соңында жастар өздерін толғандырған сұрақтарын қойып, мамандардан тұшымды жауап алды. Ұйымдастырушылар мұндай кездесулер алдағы уақытта да жалғасын табатынын атап өтті.
Comments