МӘШҺҮР ЖҮСІП ЕЛДІ МЕКЕНІНДЕ АУЫЗ СУ САПАСЫ ЖАҚСАРТЫЛДЫ – ТҰРҒЫНДАРДЫҢ ӨТІНІШІ ЕСКЕРІЛДІ

Түркістан облысы, Отырар ауданына қарасты Ескі Иқан ауылдық округіндегі Мәшһүр Жүсіп елді мекенінің тұрғындары соңғы уақытта ауыз судың сапасына алаңдаушылық білдіріп, бұл мәселені шешу үшін жергілікті билікке жүгінді. Тұрғындардың айтуынша, бұрын таза әрі тұтынуға жарамды болып келген ауыз су соңғы кездері лайланып, жағымсыз иіс пен дәмге ие бола бастаған. Бұл жағдай елді мекендегі тұрғындардың күнделікті тұрмысына айтарлықтай қолайсыздық тудырып, денсаулыққа қауіп төндіруі мүмкін деген алаңдаушылыққа негіз болды.
Аталған жағдай жергілікті билік өкілдерінің назарынан тыс қалмады. Аудан әкімі Мақсат Таңғатаров бұл мәселені дереу жеке бақылауына алып, ауыл тұрғындарымен кездесуге арнайы барды. Кездесу барысында әкім тұрғындардың талап-тілектерін тыңдап, мәселенің туындау себептерін зерделеу мақсатында жауапты сала мамандарына нақты тапсырмалар жүктеді.
Қазіргі таңда Мәшһүр Жүсіп елді мекенінде 120-ға жуық үй орталықтандырылған ауыз сумен қамтылған. Бұл инфрақұрылым ауыл тұрғындарының тұрмыс сапасын арттыруға бағытталған маңызды қадам болғанымен, су сапасының нашарлауы мәселені қайта күн тәртібіне шығарды. Тұрғындармен кездескен аудан басшысы су жүйелерінің техникалық жағдайы мен тазарту деңгейін мұқият тексеруге тапсырма беріп, бұл бағытта нақты жұмыстар басталып кетті.
Мәселенің шешімі ретінде елді мекендегі су тарату жүйесіне арнайы тазалағыш фильтр орнатылды. Бұл сүзгі жүйесі судың құрамындағы зиянды қоспаларды жойып, оны ішуге жарамды, санитарлық-гигиеналық талаптарға сай күйге келтіруге мүмкіндік береді. Тазартылған су бүгінде тұрғындарға қайта беріліп, ауыз судың сапасы едәуір жақсарған. Мамандардың айтуынша, орнатылған фильтрлер заманауи стандарттарға сәйкес жасақталған және судың мөлдірлігін, иісін, құрамындағы ауыр металл мен бактерияларды тазалауда жоғары тиімділік көрсетеді.
Мақсат Таңғатаров мәселені тек уақытша емес, түбегейлі шешу қажеттігін ескертіп, болашақта ауылдың су инфрақұрылымын жаңғыртуға бағытталған кезең-кезеңімен жұмыстар жүргізілетінін айтты. Аудан басшысы бұл бағыттағы жұмыстарды өзінің тікелей бақылауында ұстайтынын жеткізді.
– Тұрғындардың денсаулығы мен тұрмыс сапасы – біз үшін бірінші орында. Ауыз су мәселесі кезек күттірмейтін, шұғыл шешім қабылдауды қажет ететін мәселе болды. Бұл бағыттағы жұмыс мұнымен тоқтап қалмайды. Қосымша зерттеулер мен қажетті техникалық шаралар арқылы мәселені түбегейлі шешеміз, – деді аудан әкімі.
Сонымен қатар, ауыз судың сапасын тұрақты бақылау мақсатында арнайы мониторингтік топ құрылып, жүйелі сынама алу және талдау жұмыстары жүргізілетін болады. Бұл – алдағы уақытта судың сапасына қатысты қайталанатын мәселелердің алдын алуға мүмкіндік береді.
Мәшһүр Жүсіп елді мекеніндегі жағдай – жергілікті биліктің тұрғындардың өтінішіне жедел әрекет етіп, мәселені шешуге шынайы ниетпен кіріскенінің айқын дәлелі. Ауыл тұрғындары да биліктің бұл қадамын оң бағалап, алғыстарын білдіруде. Олардың айтуынша, сүзгіден өткен ауыз су қазір тұтынуға жарамды, әрі алдағы уақытта мәселенің толық шешімін табатынына сенім мол.
Жалпы, Түркістан облысы мен оның аудандарында ауыз су мәселесі – басты стратегиялық міндеттердің бірі болып табылады. Облыс әкімдігі мен тиісті басқармалар бұл бағыттағы жұмыстарды жүйелі түрде жалғастырып, барлық ауыл-аймақты сапалы, қауіпсіз ауыз сумен қамтамасыз етуді көздеп отыр.