Бүгін Түркістан қаласында Қазақстан Халқы Ассамблеясы жанындағы облыстық Аналар кеңесінің ұйытқы болуымен Ұлттық домбыра күніне орай, «Үкілі домбыра» тақырыбында іс-шара өтті.
Іс-шараның мақсаты — жас ұрпақтың санасына отаншылдық ұғымын қалыптастыру. Сондай-ақ, қазақтың ұлттық аспабы домбыраны дәріптеу арқылы қоғамды ұлттық мәдениетті сақтау және жаңғырту идеясының айналасында одан әрі топтастыра түсу.
Игі шара шаһардағы «Қарлығаш» балабақшасында ұйымдастырылды. Оған Аналар кеңесінің мүшелері, балабақша ұжымы қатысты. Жиында Түркістан облысы қоғамдық даму басқармасы «Қоғамдық келісім» КММ басшысы Эльмира Жанғазиева жас балғындарды мерекемен құттықтады.
– Домбыра – қазақтың киесі, қасиеті, қазынасы. Бүкіл Қазақстан халқын біріктіретін теңдесі жоқ мәдени мұра. Жыл сайын шілденің алғашқы жексенбісіне дөп келетін, ұлттық аспабымызды ұлықтауға арналған бұл мереке 2018 жылдан бері елімізде кеңінен аталып өтеді. Домбыра күнінің мерекеге айналуы — көнеден жеткен асыл қазынамызға, ұлттық мұрамызға берілген лайықты баға деп білеміз. Балаларымыз рухты, білімді, отаншыл болып өсе берсін! Әр сәбиге бақытты балалық шақ тілейміз. Ұлттық руханиятымызды дәріптейтін бұл мереке домбыраның мәртебесін биікке көтере берсін! – деп, жүрекжарды лебізін білдірді.
Төл аспабымызды ұлықтаған шарада ҚХА жанындағы Түркістан облыстық Аналар кеңесінің төрайымы Гүлсара Тоққұлова және ұлағатты ана Дүйсенкүл Жамбылова бастаған аналар қауымы бүлдіршіндерге домбыраның қадір-қасиетін ұғындырып, сыйлықтар табыстады.
Мерекелік іс-шарада балалар би билеп, әуезді ән шырқап, өз өнерлерін көрсетті. Шара соңында бүлдіршіндер алғыстарын айтып, ерекше көңіл күйде тарқасты.
Айта кетейік, 2018 жылы ашылған «Қарлығаш» балабақшасы шаһардағы үздік балабақшалардың бірі. Мұнда 12 топ бар. Балабақша директоры Ұлдана Ерболатқызының айтуынша, 280 орынға арналған ғимаратта барлық жағдай жасалған.
Comments